CULLITTIVU PÀ I DIRITTI DI U POPULU PALESTINESE AIACCIU u 13 d’Aprile di u 2002 MANIFESTAZIONE URGENZA PALESTINA 1500 personnes avaient répondu le 13 avril dernier à l'appel du collectif pour une manifestion de soutien aux droits du peuple palestinien. Celà faisait longtemps qu'en Corse on avait vu une telle mobilisation pour une cause internationaliste. Déclaration lue à l'issu de la manifestation Semu quì, tutti aduniti, sta sera, pà una chjama URGENZA PALESTINA, chì avemu cuscenza ch’è no semu, à mumenti, à l’orlu d’esse à caternu in l’Oriente Vicinu. Quale hè chì pò suppurtà a guerra d’agresione ch’ellu face u guvernu di SHARON à e pupulazione civile palestinese ! Quale hè chì pò accittà u so scopu, ormai palisatu, di strughje l’Autorità Palestinese è u so presidente Yasser ARAFAT chì ghjè sempre accampatu è in periculu di morte ! Quale chì ùn hè spavintatu da e maghjine è e testimunianze chì ci ghjughjenu, ogni ghjornu, da i tarritorii palestinesi : - Carri armati chì sciaccianu tuttu induv’elli passanu… - Millaie di case spiantate da i bumbardamenti tarrestri o aerei, cità distrute sane sane… - Razzie è arresti massicci di ghjuvanotti, pupulazione accampate senza alcunu cuntatu cù u mondu… - Centinai di morti è di feriti… - Spidali bioti, chì i feriti ùn ponu esse curati, imbulanze pigliati cum’è segni da i tiratori israeliani… Avemu suspetti di stirpeghji, di turmenti, è forse l’orridezza in Jenine, induva sarianu stati intarrati, da e spalittatrice di l’armata israeliana, decine di cadavari sottu à e ruvine di e so case. Dimu suspetti, chì ghjè una guerra piatta, induva i ghjurnalisti è ancu i cunvogli di a Croce Rossa sò pruibiti d’accessu in le zone di i cumbatti è in quelle messe in coprifocu. Iè, ne saremu, à mumenti, à caternu s’è a cumunità internaziunale, l’Auropa, tutti i Stati ne fermanu à u dettu senza fà nulla di precisu, accitendu i ricusi di SHARON. Iè, ne semu guasgi à caternu chì, ogni ghjornu chì passa, ci avvicinemu di l’abissu. Eppuru, di marzu scorsu, u Cunsigliu di Sicurità di l’O.N.U hà aduttatu una risuluzione bella cà chjara, chì dice a so esigenza di vede cissà subitamente tutte e viulenze, chì ramenta ch’ellu vole, in lu rughjone, dui Stati, ISRAELE è A PALESTINA chì campinu fiancu à fiancu, cù cunfini stagliati, ricunnisciuti è sicuri. Cum’è chì ùn ci hè mezu di mette in ballu, subitu subitu, sta risuluzione, esigendu l’arrestu di a guerra fatta da Israele, u so ritiru da tutti i tarritorii occupati è l’apartura , senza tricà, di niguziati di pace ! À oghje chì hè oghje, 3 milioni è 200 milla palestinesi campanu in Palestina occupata, fra elli 1 milione è mezu sò rifugiati spartuti in 60 campi in Gaza è in Cisgiordania, certi dipoi 1948, d’altri dipoi 1967. In sopra più 2 milioni è mezu di palestinesi sò rifugiati for di Palestina, in Giordania, Siria, à u Libbanu… Ci tocca à dì chì, prima di a guerra d’avà, a Palestina era scumpartuta in 70 tarritorii è 10 milla punti di cuntrolu, mentre chì l’introduzzione di culunie israeliane nove s’hè perseguitata circhendu di spizzà u tarritoriu naziunale palestinese. Chì firmarà di i tarritorii palestinesi dopu à sta guerra, alora chì SHARON vene di fà entre, in lu so guvernu, raprisententi di partiti riligiosi stremisti è integristi chì pratendenu vulè fà " un Grand Israele " chì avissi cum’è cunfini u fiume Giurdanu è u mare Mediterraniu. Quand’è no dinunziemu ste realità, saria segnu ch’è no pigliemu a pratesa di i palestinesi ? INNÒ, chì cundannemu dinò l’attentati chì piglianu cum’è segnu e populazione civile israeliane. INNÒ, chì semu sulidarii di e donne è di l’omi chì, in Israele, ricusanu e logiche di guerra è si movenu da ch’ella cessi a barbaria in Palestina. U nostru campu, a nostra spiranza ghjè u dirittu internaziunale. Dichjaremu chì solu a ricunniscenza di i diritti di u populu palestinese à avè u so statu, pò fà ch’ellu ci sia a pace pà unu è pà l’altru. À tempu, dimu chì u dirittu di Israele à campà ùn pò esse scioltu da u prublema di i diritti naziunali di i palestinesi. Forse chì certi pensaranu ch’è no semu pretenziunuti, à quessi noi dimu chì a nostra cuscenza è u nostru spiritu civicu ci impedisce di stà zitti davanti à i colpi datti à u dirittu internaziunale (Cunvenzione di Gineva) chì definisce a prutezzione minima di e pupulazione civile in tempu di guerra. Dimu chì, postu chì a cumunità internaziunale stà senza fà nulla, tocca à noi, ghjente cuscente di i fatti è malfatti, di moveci. - Par esempiu, noi altri aurupei, vulemu ch’ellu sia suspesu l’accordu d’assocciu trà Unione Aurupea è Israele Dimu chì sò militanti cuscenti è curaghjosi chì anu impeditu l’assassinamentu di ARAFAT.A nostra azzione ghjè dinò una risposta à a dumanda esatta di a delegazione israelo-palestinese, chì ghjè stata accolta di ghjinnaghju scorsu, da u cunsigliu municipale d’Aiacciu, di mubilizà a ghjente di manera à ùn lascià fà à a muta à SHARON. Eccu ciò u sensu prima di e mubilizazione chì u Cullittivu " pà i diritti di u Populu Palestinese " vole cuntinuvà à move, fendu, par undettu, firmà una petizione massiccia ch’è no vi dumandemu di piglià à contu vostru. Subitu, pà a so prossima adunita luni sera, u Cullittivu circarà di riflette à l’aiutu ch’ellu pò porghje à l’urganizazione umanitarie corse pà purtà aiutu à e populazione civile palestinese. À quelli chì dubbiteghjanu rispundimu dinò, ch’è no semu sempre mubilizati pà opponeci à tutte l’agressione chì culpiscenu à cumunità abreia in Francia. Infine rispundimu, à quessi quì, ch’è no cuntinuvaremu à lampavvi chjame pà adunisceci tutti, pà manifestà, pà fà sente, sempre dipiù, a voce di a Corsica è dumandà una pace ghjusta chì durghi in l’Oriente Vicinu. À nome di u CULLITTIVU vi ringraziemu d’esse vinuti tutti cusì numarosi.. Ava Basta / Ligue des droits de l'homme / CGT Corse du Sud / STC / Secours Populaire / Voce e Ventu / Cinqui sò / Canta u Populu Corsu / Per a Pace Manca Naziunale / Indipendenza / Verdi Corsi / ANC / a Chjamà pè l'indipendenza / U Rinnovu / UPC/Scelta Nova / Femu Aiacciu / Corsica Nazione / Mossa Naziunale / PCF de Corse du Sud / PS de Corse du Sud / MDC de Corse