U 23 DI GHJUGNU IN CUVENTU DI CALACUCCIAL’Associu Niolu Memoria è Ricordu hà urganizatu a cummimurazione di u sacrifiziu di l’impiccati è di i dipurtati di u Niolu u 23 di ghjugnu scorsu.
Sta ghjurnata di ricordu ramenta l’annu 1774 " l’annu di a disgrazia " dicenu à spessu i Niulinchi .
Dopu à Ponte Novu, a risistenza hà cuntinuatu dinò una bellu pezzu più o menu à palesu. In li principii di u 74 Nicudemu PASQUALINI, scalatu da a Tuscana, sbarcò à l’appiattu circhendu di move una rivolta, i Niulinchi eranu parechji cun ellu.
Hè tandu chì a ripressione l’ hà minati di dipiù à elli quella annata.
L’infamu SIONVILLE è u Culunellu GAFFORI ghjunti in Niolu arristonu una mansa di ghjente è i purtonu in cunventu di Calacuccia cambiatu in prighjò. In lu frà tempu e case eranu sacchighjate è po dopu brusgiate, è e ghreghje scannate.
Dodici patriotti funu purtati in tribunale, è una cinquantina mandati in galera in Tulò duve morsenu guasgi tutti in la Tora maiò di u Forte Lamalgue.
I dodici, arristati u 21 di ghjugnu di sera, funu intarrugati è ghjudicati u 22 è 23 sinamente à meziornu è marturiati è assassinati in lu dopu meziornu di u 23.
L’Associu hà fattu mette una lastraca di marmaru in cuventu di Calacuccia (vede a fotò) ramintendu casate, nomi è età di l’impiccati (u più giovanu Marcumaria ALBERTINI avia diciasette anni ).
*Vede " Le Procès des Niolins-1774 " Société d’études du Niolu
Cù un introitu di Francescu FLORI.
*Ricurdemu dinò a pezza di teatru " A RIMIGNA, sicondu prucessu di Niolu " di Rinatu COTI è Saveriu VALENTINI (1974).
