Manifestazione di u 23 A MANCA NAZIUNALE ÙN SARÀ MICCA PRISENTE À A MANIFESTAZIONE È DICE PARCHÈ. A Manca Naziunale ùn participarà micca à a manifestazione pà a lingua corsa cunvucata da l’urganizazione studiantine. Mai ùn hè stata detta , in locu, ch’è no faciamu parte di u cullittivu. Ci dispiace assai chì sta manifestazione si fia à a lestra, senza mancu piglià u tempu d’appruntalla in cundizione di dipiù bone. Masimu chì a situazione pulitica (alizzione presidenziale) ci face teme pruvucazione chì sarianu un dannu maiò pà a nostra ghjuventù è u nostru paese. A dilusera nata da u fiascu di " l’accords de Matignon " si capisce, mà ùn ci stupisce mancu appena chì ne aviamu fattu a critica bellu prima, quandu e discursate anu cumenciu in le cundizione ch’omu cunnosce. U clima puliticu hè oghje più cà foscu, è ci si pare chì si pudia attimpà a manifestazione di manera à fanne un veru successu pupulare , sopratuttu chì u pinseru di a lingua hè, oghje, arradicatu in lu nostru populu. Par contu nostru, pinsemu chì a rivindicazione di a lingua ùn deve micca esse partigiana ch’osinnò sarà indebbulita. A manifestazione di u 97 hè stata una riescita parchè emu sappiutu francacci di stu sbagliu. A Manca Naziunale hà luttatu abbastanza pà a lingua corsa pà sapè chì a lingua nustrale deve , ben intesu, esse in situazione di parità cù u francese s’ella si vole salvà, si chjama quessa a CUUFFIZIALITÀ. Hè una misura di ghjustizia chì ci tocca à fà capisce à TUTTU u nostru populu, semu dunque pronti à parlanne cù tutti quelli chì si primureghjanu da veru di a lingua, è à participà à tutte l’azzione chì anu a vuluntà d’allargà a mossa à tutte e forze suciale, assuciative è pulitiche di u nostru paese è ancu al di là